ഈ വർഷത്തെ ഭൗതികശാസ്ത്രത്തിനുള്ള നോബൽ സമ്മാനം ബ്രിട്ടനിൽ നിന്നുള്ള റോജർ പെൻറോസ്, ജർമ്മനിയിൽ നിന്നുള്ള റെയ്ൻഹാർഡ് ജെൻസൽ, യുഎസിൽ നിന്നുള്ള ആൻഡ്രിയ ഗെസ് എന്നിവർക്ക് സംയുക്തമായി നൽകി.
പ്രപഞ്ചത്തെയും തമോഗർത്തങ്ങളെയും കുറിച്ചുള്ള നമ്മുടെ ആധുനിക ധാരണയെ രൂപപ്പെടുത്തിയ കണ്ടെത്തലുകൾ നടത്തിയതിനാണ് ഇവർക്ക് പുരസ്കാരം ലഭിച്ചത്. സമ്മാനത്തിന്റെ പകുതി പെൻറോസിന് “തമോഗർത്തം രൂപപ്പെടുന്നത് ആപേക്ഷികതാ സിദ്ധാന്തത്തിന്റെ ശക്തമായ മുന്നറിയിപ്പാണെന്ന് കണ്ടെത്തിയതിന്” നൽകുകയാണ് – കമ്മിറ്റി വെബ്‌സൈറ്റിൽ പറഞ്ഞു. ഗണിതശാസ്ത്ര മോഡലുകൾ ഉപയോഗിച്ച്, ആൽബർട്ട് ഐൻസ്റ്റീന്റെ ആപേക്ഷികതാ സിദ്ധാന്തത്തെ മാത്രം ആശ്രയിച്ച് തമോഗർത്തങ്ങളുടെ രൂപീകരണം സാധ്യമാണെന്ന് പെൻറോസ് തെളിയിച്ചു.
സമ്മാനത്തിന്റെ ബാക്കി പകുതി ജെൻസലും ഗെസും തമ്മിൽ പങ്കിട്ടു. “അദൃശ്യവും ഭാരമേറിയതുമായ ഒരു വസ്തു താരാപഥത്തിന്റെ കേന്ദ്രത്തിലെ നക്ഷത്രങ്ങളുടെ ഭ്രമണപഥത്തെ നിയന്ത്രിക്കുന്നു” എന്ന് കണ്ടെത്തിയതിന്, കുറിപ്പ് തുടർന്നു.
വിചിത്രമായ എന്തോ ഒന്ന് നടന്നു കൊണ്ടിരിക്കുന്ന ക്ഷീരപഥത്തിന്റെ പൊടിമൂടിയ കേന്ദ്രത്തിലേക്ക് ജെൻസലും ഗെസും നോക്കി, അവിടെ ആ സമയത്ത് അവർക്ക് കാണാൻ കഴിയാത്ത എന്തോ ഒന്നിനെ നിരവധി നക്ഷത്രങ്ങൾ വലം വയ്ക്കുന്നു – നമ്മുടെ സൂര്യന്റെ പിണ്ഡത്തിന്റെ ഏകദേശം 4 ദശലക്ഷം ഇരട്ടി വലിപ്പമുള്ള തമോഗർത്തം.
ഓരോ താരാപഥവും അതിമനോഹരമായ തമോഗർത്തത്തിന്റെ ആവാസ കേന്ദ്രമാണെന്നുള്ള നിഗമനത്തിലെത്താൻ ശാസ്ത്രജ്ഞരെ സഹായിച്ച ഒരു നിർണായക കണ്ടെത്തലായിരുന്നു ഇത്. ഫിസിക്സിന് നോബൽ സമ്മാനം നേടുന്ന നാലാമത്തെ വനിതയാണ് കാലിഫോർണിയ യൂണിവേഴ്സിറ്റിയിലെ പ്രഫസറായ ആൻഡ്രിയ ഗെസ്.
സ്റ്റോക്ക്ഹോമിലെ റോയൽ സ്വീഡിഷ് അക്കാദമി ഓഫ് സയൻസസിലാണ് നോബൽ അസംബ്ലി സമ്മാനം പ്രഖ്യാപിച്ചത്.
ഹെപ്പറ്റൈറ്റിസ് സി വൈറസ് കണ്ടെത്തിയതിന് മൂന്ന് മെഡിക്കൽ ശാസ്ത്രജ്ഞരായ ഹാർവി ജെ ആൾട്ടർ, മൈക്കൽ ഹോട്ടൺ, ചാൾസ് എം റൈസ് എന്നിവർക്ക് കഴിഞ്ഞ ദിവസം വൈദ്യശാസ്ത്രത്തിനു നൊബേൽ സമ്മാനം ലഭിച്ചു.